महानिर्देशनालय नबन्दै माओवादी लडाकू ब्यारेक प्रवेश आजै विशेष समितिको बैठक बस्ने

६ मंसिर, काठमाडौं । नेपाली सेनाभित्र महानिर्देशनालयको संरचनात्मक पक्ष प्रष्ट भइनसक्दै माओवादीका पूर्वलडाकूहरु आजबाट सेनाका ब्यारेकमा धमाधम प्रवेश गर्न थालेका छन् । तालिमका लागि ब्यारेक पसेका पूर्व लडाकूले पाउने दर्जा सम्बन्धमा पनि अझै प्रष्ट भैसकेको छैन । लडाकूबारे निर्णय गर्न आज बेलुका ५ बजे सेना समायोजन विशेष समितिको बैठक नयाँ बानेश्वरमा बस्दैछ ।

तालिमका लागि लडाकूहरु सैन्य ब्यारेकमा हाजिर भए पनि नेपाली सेनाको महानिर्देशनालयको नीतिगत एवं संरचनागत पक्षबारे अझै टुंगो लागिसकेको छैन । कात्तिक ३० गते नै  सेना समायोजन विशेष समितिको म्याद सकिएकोमा सरकारले मंगलबार एक महिनाका लागि म्याद थपेको छ । आज बेलुका बस्ने विशेष समितिको बैठकले महानिर्देशनालयसम्बन्धी निर्णय गर्ने बताइएको छ । लडाकूहरु तालिमका लागि हाजिर भैसकेका माओवादी लडाकूले पाउने दर्जाका बारेमा पनि अहिलेसम्म अन्यौल छ ।

समायोजनका लागि छानिएका लडाकूमध्ये अधिकृतस्तरमा छानिएका ७१ लडाकू भक्तपुरको खरीपाटीमा र अन्य १ हजार ४ सय ६० लडाकूले देशका विभिन्न बाहिनीमा मंसिर ६ गते सम्पर्क गर्ने पूर्वनिर्णयअनुसार उनीहरुले आजबाट ब्यारेकमा सम्पर्क गरेका हुन् । नेपाली सेनाले उनीहरुलाई दशैंअघि ४५ दिने बिदा लिएर मंसिर ६ गते हाजिर हुन भनेको थियो । पूर्वाञ्चलका लडाकूहरु उदयपुरको गाईघाटमा र मध्यमाञ्चलबाट त्रिशुलीमा तालिमका लागि हाजिर भएका छन् । पश्चिममा रहेका लडाकूहरु स्थानीय स्तरका बाहिनीहरुमा भेला भएका छन् ।

विशेष समितिको अभिभारा

माओवादी सेनाका पूर्वकमाण्डर चन्द्रप्रकाश खनाल -बलदेव)का अनुसार अब विशेष समितिले टुंगो लगाउनुपर्ने दुईवटा विषय छन् । ‘सबैभन्दा पहिले विशेष समितिले महानिर्देशनालयको नीतिगत एवं संरचनात्मक पक्ष टुंग्याइदिनुपर्छ, दोस्रो केही पदहरुबारे राजनीतिक तहमा भित्री सहमति भएका छन्, त्यसलाई क्याबिनेटको निर्णयबाट हुन्छ, या विशेष समितिले टुंगो लगाउने हो, त्यसको पनि समाधान गरिनुपर्छ ।’ खनालले अनलाइनखबरसित भन्नुभयो ।

खनालका अनुसार यसअघि राजनीतिक तहमा माओवादी लडाकूहरुलाई महानिर्देशनालयमा एक महासेनानी र दुई प्रमुख सेनानी दिने सहमति भएको छ । ‘लडाकूहरु नेपाल सरकारको मातहतमा आएसकेको हुनाले अब यसलाई नेपाली सेनाले भन्दा पनि विशेष समिति वा क्याबिनेटका बैठकले मिलाउनुपर्छ, यसलाई विशेष समितिले नै मिलाउँदा राम्रो हुन्छ ।’-खनालले भन्नुभयो ।

कन्टेनरका बन्दूक के गर्ने ?

नेपाल सरकारको मातहतमा आइसकेका र हालसम्म कन्टेनरमा रहेका माओवादीले प्रयोग गरेका हात-हतियार के गर्ने भन्ने प्रश्न पनि महत्वपूर्ण रहेको बताउँदै पूर्वकमाण्डर खनालले भन्नुभयो-’कन्टेनरका हतियार म्युजियममा राख्ने या के गर्ने भन्ने पनि सरकारले टुंगो लगाउनुपर्छ ।’